ای صبا! تئزجه ایمئیل ایله خبر وئر او یارا
شکر اولا آللاها، قیش چیخدی، یئیشدیک باهارا

سوفرادا یوخدور اگر بیر نئچه ” سین” غصه سی یوخ
یئرینه، یئدیی ” سین” ائوده اوتورب هاردان- هارا!

سکینه، سامیه، سلطان باجی، سئودا، سریه
قالیب ائوده، قوجالیبلار، داها سیمین له سارا

ار تاپیلمیر بولارا، ایش ده کی یوخ جامعه ده
ایش لری تکجه سوماق سورماق اولوب شام- ناهارا

یئددی ” سین” ایسته میرم، یئددی جه کوپ سرکه وئرین
تورشامیش قیزلارا بیر چاره قیلیم من بئچارا

بیر نفر رحم ائله ییب، ائلچی گله قیزلاریما
حاضرم من جانیمی اوچ دونه چیرپام دیوارا

کوچوب اوغلان لاریمیز، هر بیری بیر اولکه ده دیر
پول- چورک آردیجا اولموش نئچه میلیون آوارا

” نخبه” دیر، هم ده آلیب شیمی، فیزیک دکتراسی
غرب ده گارسون اولوب، ساعتی اوچ- دورد دولارا

ولی یوخ غصه یئری، گر کوچوب اوغلان لاریمیز
گئنه افغانلی بیزی نایل ائدیب افتخارا

یاخشی بیر مشتری دیر قیزلارا افغانلی جوان
مشهده، تهرانا باخ، گور نئجه چیخمیش بازارا

دوز دو وار خیرداجا بیر عیبی بو افغانلی لارین
فرق قویمازلار اولار چوخ خانیم ایله داوا را

نئیله مک؟ چون کی ” خودی”، هم بیزه ” قارداش” ساییلیر
نه اولور ” موز” سئوله سک بیزده سارالمیش خیارا؟!

گئنه چاشدین سوزونو، ” آرش”! آمان دیر، بس ائله
ساکت اگلش، داداشیم! چوخ دانیشیب، قویما بارا