اوشاق چاغلاریمدان اؤز اصیل آنا دیلیمیزه چؤخلو علاقه‌م وارایدی، اؤنا خاطیر رحمتلیک آتامین کناریندا عائله ایله بیرلیکده ایله شیب آتام اؤخودوغو کیتابلارا اؤجمله ده‌ن امیر ارسلان و یا موختار نامه و باشقا ناغیل لارا چوُخ هوس له قولاغ وئرردیم. بئله لیکله اؤ قولاغ آسماخلار باعیث اؤلدو کی أن کیچیک یاشیمدان تورکونی – فارسی داندا یاخشی اؤخویا بیلدیم.
دؤردو نجو صینیف ده چالیشیردیم کی بیرگون اؤیره تمن کلاسا گلن ده اؤزوایله ایکی دانا کیتاب گتیردی، اؤ درسی باشلامامیشدان قاباخ اوزون بیزلره توتوب دئدی: اوشاقلار هرکیم ائلیه بیلسه بو تورکی کیتابلاردان بیر جمله اؤخویا بولارین ایکیسینی ده اؤنا تقدیم ائده جاغام. من اؤگونه قده‌ر جمع بیر یئرده اؤزومی سنیاما میشدیم و تکجه اؤلاندا تورکی اؤخویاردیم. اؤز – اؤزومه دئدیم: بویون بیر فرصت دیر هم اؤزومو سینارام و همیده ایکی دانا کتاب صاحیبی اؤلارام، آللاها توکل دئیب قاباغا گئتدیم. اؤیره تمن منی بیر باشدان – آیاغا گؤز آلتیندان کئچیردیب صونرا منه دئدی: هن رضازاده نه دئمک ایستیسن؟
(بونو قوللوغوزا عرض ائله مه لیم کی من ریاضی و علوم درس لرینده ضعیف ایدیم اؤناگؤره کلاسدا چوخ حسابا گلمزیدیم و اؤیره تمن ده شک ده قالمیشدی) پس دیلیم توتار – توتماز دئدیم: آقا اجازه گلمیشم تورکو کیتابلاردان اؤخویام. بودفعه اؤیره‌تمن دینمه ده‌ن کیتابلارین بیرینی منه وئردی، منده اللریم تیتره یه – تیتره‌یه کیتابی الیندن آلیب باشلادیم اؤخوماغا.
اؤ کتاب گونش‌لی و قوزی لی آذربایجان شاعر لریندن سئچیلمیش بیر اثر ایدی، اؤ شعری کی من اؤخودوم آدی «من نه دئیه رم ایدی» کی تأسوفله او جریاندان چؤخلو ایللر اؤتدویونه گؤره فقط ایلک بیتی یادیمدا قالیب کی یاز میش دی:
من دییرم ظولمکاردان آزاد اؤلسون مسکنیم
پؤزولماسین باغلار تکین خزان وورموش گولشنیم
بو شعره باشا چاتاندان صونرا اؤیره تمن اوشاقلاردان ایسته دی کی منی نئچه موددت آلقیش لاسین لار و اؤزوده آیاغا قالخیب بیر حالداکی او کیتاب لاری منه تقدیم ائدیردی گوزلوگونون آلتیندان گؤزلریندن یاش تؤکه – تؤکه منیم آننیمدان اؤپدو و دئدی: ساغ اؤل اؤغلوم، من بوگون سنه گووه نیرم و آرزو ائدیره‌م کی گله‌ جه گین خؤش اؤلسون.
دئمه لیم کی کیتابلارین اؤ بیریسینین آدی صمد بهرنگی یازان «بالاجا قارابالیق» ایدی و اؤ اؤیره تمنین ده آدی «حمید آرش آزاد» ایدی روحو شاد اؤلسون
«بهمن رضا زاده» تبریز