استادیم آرش ایلن ،او زامان کی رحمتلی استاد شیدا،سخا مهر و یالقیز قید حیاتدایدیلار،قهوه خانا دا تانیش اولدوم. سؤزون دوزو منی جمعه گون لری اورا چکن، آدینی ادبیات خادمی قویان یحیی شیدا جناب لاری اولموش.
انقلاب اسلامی دان سورا آنا دیلیمیز گون اوزو گؤردو.منده هر بیر کتاب اؤنجه لیکله شعر ونظم یاییلدیقدا،وسعوم قدر الده ائدیب و ماراقلا اوخوماغا باشلادیم،او نکته کی منه عجیب گلیردی ،بو کتابلارین مقدمه سینین آخرینده کی آد ایدی: ادبیات خادمی یحیی شیدا!
من چالیشدیم اوستادین پاتوغونا یول تاپدیم. و اورادا طنز شاعرلری نیده زیارت ائتدیم،اوجمله دن جناب آرش کی معمولا گئژ ده گلسه یدیلر،الی بوش گلمزدیلر(اوزامان اثرلری چاپ اولمامیشدی)من ماراقلا اوشعری آلیب کپی ائدیب اصلین قایتاراردیم،سؤزون دوزو من هئچ تانیدیغیم شاعرلرده بو جسارت و سخاوتی گؤرمه میشم، من کی بیر ناشی شاگرد ایدیم باشلادیم غلط -غولط دن بیر زاد لار یازماغا کی اوستادلار اولارین سهوین دییره ر کن منی تشویق ائتدیلر تا اینکی بیر مختصر ردیف،قافیه ووزن اؤیرندیم،ایندی اشاغدا کی نظم اوزامانین یادگاریدی کی استاد آرش حیات دا کن ،جسارت ائدیب اؤز محضر لرینده اوخودوم ،ایندی اونو اوستادین روحونون شاد ااولدوغونا خاطر اشاغادا عینا گتیری رم :

(( آرش))

گئجه لر اویقویا حسرت اولوبان،
اوخورام ذکر و دعا ایله قرآن

آمما بیر اویغو کئچیر ذهنیمدن،
تک دعا دان اولاماز تکجه قران!

حرکت اولماسا اولماز برکت
دول داشا سنده وار ایسه ایمان

او کی تاریخده یازیب لار یادیما-
دوشور،ار آرش ایلن تیر و کمان

جانینی قویدو اوخون چلله سینه
آتدی تا ملکه وئره وسعت و شان

نه گؤرن واردیر اؤزون یا کی اوخون
ایندی اسطوره دی،اولموشسا یالان

ائللرین عشقینی یوردا ،وطنه
بو مثل دن دوشونور اهل زمان

چوخ آنا،بویلو ایکن عهد ائله ییر:
آدین آرش قویا دوغسا اوغلان

بیزیم (آرش) ده آتیب دیر اوخونو
جانین ائتمیش ائله یوردا قوربان

بو نه اسطوره دی نه افسانه
واقعیت دی گؤرور سوز یاران

اثری گوزگو کیمی صام-صافدیر
سؤزلری ظالیمه اوخ تک تاخیلان

ایکی دونیانین آتیب دیر داشینی
جانینا ،جسمینی قئلمئش زیندان

ایندی کی خسته دوشوب بالینه،
یوخلی یاق،حالینی تاحد توان

(شعر سئون) درد قالاما درد اوسته
یار مدد قیلسا،تامام دیر حرمان.

۸۴/۳/۳۰