گولمک یؤلون (آرش) ده هامار ائیلدی گئتدی
بؤز پاییزی شعریله باهار ائیلدی گئتدی
بیر گون شکره دوز؛ دوزا سؤیلیب شکر آنجاق
بیر گون سؤزولن خلقی خومار ائیلدی گئتدی
آغلاتملارین گولمکه قاتدی اؤخون آتدی
(گیزلتدی یایین) (غربی) حمار ائیلدی گئتدی
نه ایستدی گویچک؛ کوسه اوندان نه ده چرکین
شعریله گؤزه‌ل چیرکینی یار ائیلدی گئتدی
داشلار کیمی حق سؤزلری دولدور دو سو فنگه
هئی تونلادی (یانگی لری) زار ائیلدی گئتدی
(من جهاندان گئدر اولسام گئنه نامیم قالاجاق)
طنزین بوتون آفاقه نثار ائیلدی گئتدی
تا؛ گؤردو تفنگ اولسا دوشر ولوله خلقه
شعریله هیولانی شکار ائیلدی گئتدی
یؤخ گؤردو قوشون چکمکه یؤل؛ دفترین یؤلون
سؤز لشکرینه آچدی هامار ائیلدی گئتدی
بیر یولدا (نیاز) شعرینه بیر پارچا دوز سالیب
طنزی؛ غزلی؛ ییغدی زومار ائیلدی گئتدی
زینال پور کرمی (نیاز) ۱/۴/۹۵ مرحوم آرش احترامینا