نه قَدَر بیرکس انسانا آرتیق یاخین اوْلا انسانین وظیفه و مسئولیتی اوْنا گؤره چْوخ راق‌دی شک یوخ کی بو آرادا متعال آلّاهدان سْورا هیچکس بیزه آتا آنادان آرتیق یاخین اولا بیلمز. بو باره ده حضرت حق قرآن کریم ده اسرائیل سوره نین ۲۳ اونجو آیه سینده کاملاً واضح بیان ائلیر کی: «وَ قَضی رَبُّکَ اَنْ لا تَعْبُدُو اِلّا اِیّاهُ و بِالوالِدَیْنِ اِحْساناً» و مشخصاً وَ بِالوالِدَیْن احساناً، جمله سینی اوچ دفعه ده آیری سوره لرده: نساء سوره سی ۳۶ اینجی آیه، انعام سوره سی۱۵۱ اینجی آیه و بقره سوره سی ۱۸۳ اونجو آیه ده تکرار ائدیر.
بو آیه لره توجْه ائله ماقینان ایکی معقول نتیجه اَلَه گْلیر.
بیرینجی بوکی، آتا و آنا حضرت حقدن سْورا بیزیم بوینوموزدا آرتیق حق لری وار و اوْنلاردان اطاعت حضرت حق برابرینده عُبودِیّتیلن بیر ردیف ده دی.
ایکنینجی نتیجه بوکی او جهت دن کی الهی حق بوینوموزدا هامیدان آرتیق و بویوک راق دی حتی آتا و آنا حقیندن، پس آتا و آنا اطاعتی و اؤنلارین امرینه باش ایماق بیر حالدا واجب دی کی ذات اقدس الهی نین دستور و فرمانلارین نقض ونفی أیله میه. هر حالدا والدین دن اطاعت آلاهین اطاعتیلن بیر ردیف ده دی واوْنلارین رضایتی حضرت حق رضاسی له برابر دی و بو آیه لر آرتیق تأکید دی بلکه بیزلری آتا و آنا باره سینده آغیر مسئولیت و تکلیفیمیزه متوجه و آگاه اِئلیه.
آتا و آنایا احسا ن قرآن اَئمّه و بویوک لرین فرمایشی اساسدا عبادتدی اوْنلارینان دوز و یوموشاق مصاحبتدن . یاخچی اخلاق و خوشا گلن رفتار و نهایتده هر شکلده اوْنلاری راحت و راضی ساخلاماق بیر حدّده کی اونلار احتیاج و نیازلارین دیله گتیرمیه لر و بو باره ده هیچ جوره روحی آزار و اذیت احساس ائله میه‌لر. نییه کی اوْنلار بیر عمر زحمت، مشقّت و حادیثه لردن دولو یاشاییشی سوره‌ن دن سونرا بیر دونیا تجربه و خاطیره یوکی له بالالارین تر و خشک ائله ماقلارینا نیازلاری وار و قطعاً لازیم دی اونلارین حریم لری حرمتیلن حفظ اولا و احترام لاری شایسته حالدا یئرینه گتیریله.
اوْراجان کی حضرت حق فرمانیله و بو آیه اساسدا کی اعراف سوره سی نین ۳۳ اونجو آیه سینده بویورور: وَ لِکُلِّ اُمَّـ‍ه اَجَل فَاِذا جاءَ اَجَلُهُم لا یَسْتَأخُرونَ ساعَـ‍هً و لا یَستَقدِمُون. الّاهین دعوتینی قبول ائلیوب حق جوارینا چاتدیلار، اوْندا اوْلادین آتا – آنا باره سینده بیر آیری وظیفه لری وار کی بنده چوخ گذرا حالدا بعضی لرینه اشاره ائلیرم.
اوْنلارین قضا اولموش شرعی تکلیف لرین شرع دستوریله یئرینه گتیرماق. بورجلارین و ‌‌‌ِدین لرین ادا ائله‌ماق. اونلارا حضرت حقدن باغیشلانماق و مغفرت ایسته ماق. اوْنلاری یاخچی لیقینان یاد ائله ماق. اوْنلارین دوستلارین گرامی ساییب و وابسته لرین صله رحم ائله ماق. آتا و آنانین آدین و یادین بویوک و عزیز ساییب هر نحویلن آدلارین دیری ساخلاماق. البته بو باره لرده چْوخلو شرعی و عرفی یول لار وار. کی اوْ جمله دن اوْلاد اِئلیه بیلر شایسته رفتار و کردارینان آتا – آناسینا خیر دُعایه سبب اوْلا و اؤز وجودون بیر جاری و ساری صدقه شکلینده والدینه گؤره قرار وِئره و هابئله مختلف الله سئور یول لارینان اونلارین یادلارین و خاطره لرین دیری ساخلایا نمونه سی همین بو مراسم لردی که دقیقاً الله رحمتینده اوْلان ائل شاعریمیز استاد حمید آرش آزادین عزیز و وفالی آقازاده سی و حرمتلی عائله عضولری هر ایل شایسته شکیلده بحق یئرینه گتیریللر. و بوگون او عزیزین ۵ اینجی ایل دونومون عزیزلیوب دوستلارین و آشنالرین او طنز یازار گؤرکملی یازیچی نین مزاری اوسته دعوت ائله ماقینان او عزیزین آدین و یادین خاطره لرده تازالیوب اؤز وظیفه و تکلیف لرین ادا ائدیب لر. کی الحق بو وفادارلیق و بو وظیفه تانیماق لار بئلنچی حرمتلی عائله دن و اولاددان شایسته دی و تقدیر یئری وارنییه‌کی بعضاً چوخلو تأسف له شاهید و ناظیروخ چوخ بویوک شاعیر، یازیچی و هنرمندلرین عائله و قالانلاری بو باره لرده اؤز وظیفه و تکلیف لرین یئرینه گتیرمیللر و او بویوک انسانلار اؤزلری گئتماق همان بئلنچی بیر قصورلار اثرینده یادلاری و آدلاریدا ذهن لردن گئتماق همان.
آلاهدان ایستیریک جناب آقای سیامک آرش آزاد و محترم عائله عضولری بوسعه صدریلن و بو برازنده لیقینان کی وارلاریدی حقدن عوض آلسین لار و گؤزه‌ل عمرلریندن انشاا… بهره‌مند اوْلسونلار و اما حرمتلی حاضیر اوْلانلار مرحوم آرش آزادین عزیز یولداشلاری و قلمداشلارینا دا ساغ اولاسیز و وار اولاسیز دئیب هامولارا ساغلیق و اوزون عومور آرزیلیریق.
والسلام علیکم و رحمـ‍ه الله
اکبر باغبان سیروس ۲۳/۵/۹۴