اوْ نیگار کی گتیره‌ر تئز- تئز ادا، قوْی گئتسین
پولا هر کیمسه ائده‌ر عشقی فدا، قوْی گئتسین

اوْکی آرتیق طاماح اوْلموش، اؤزونه وعده وئریر
بویورور: خورما منیم، هم‌ده خُدا، قوْی گئتسین

دلبرین غایب اوْلورسا گئجه- گوندوز سندن
ایل‌ده بیر یوْل اوْنور گؤرسن یوخودا، قوْی گئتسین

خوْش گونونده سنه دوْستلوق ائدیب، هم سفره اوْلان
پیس گونونده سنی سالمازسا یادا، قوْی گئتسین

ناهارا اوْلسا توْیوق، یار سنه وئرسه قانادین
اؤزو تئز آتسا الین دؤش‌له بودا، قوْی گئتسین

دوز- چؤرک سنله یئییب، دوز قابینی سیندیرانین
سوْنرادان گلسه دیلی- آغزی دادا، قوْی گئتسین

نئچه ایل حقّ سلام، دوز- چؤرگی، یاخشی‌لیغی
آز زاماندا وئره هر کیمسه بادا، قوْی گئتسین

او نماینده‌کی ائل‌دن دیله‌نیردی رائین
مقاما ائتسه ائلی، شهری فدا، قوی گئتسین
شورادا عضو اولان یانماسا شهره اورگی
ساتسا شهرین پولایا باشقازادا، قوی گئتسین

اوْ وزیر کی، وطنه وعده وئریب خدمت ائده
ایندی هر گون گتیریریر مین جور ادا، قوْی گئتسین

بوتون ائل‌لر اوْیانیب، کامپیوتئر عصری گلیب
هر کیم ایستیر کی قالاق بیز یوخودا، قوْی گئتسین

هر او کس کی، اؤزو سالار اوْلاراق، بَی لیگ ائده
قادین حقّین داناراق، چکسه اوْدا، قوْی گئتسین

دوز دور «آرش» آدی دیل‌لرده، آغیزلاردا گزیر
قلمین ساتسا پولا بیر گون، اوْ دا قوْی گئتسین