گؤزه‌للیکلره دوْغرو بیر باخیش، اوره‌یی سئوینجه چولقاییر، عموره شیرینلیک جالاییر، یاشاییشی موتلو- اومیدلی ائله‌ییر. کیمسه‌کی گؤزه‌للیگی ایسته‌دی، دوْداقلاردا گولوشو، اوره‌کلرده سئوینجی ایسته‌دی. اوْ، یاشاییشدا دئییب- گولمه‌یی، چالیب- چاغیرماغی اؤزونه ایسته‌دیکجه، اؤزگه‌یه‌ده ایسته‌دی.
بو باخیش یاشاییشین گؤزه‌للیکلرین گؤره‌ر ایکن، چیرکینلیک‌لری‌ده گؤرور. بیرینجی‌نی سئوه- سئوه ایکنجی‌نی تنقید تازیانه‌سی آلتیندا یوْخسوزلوغا آپاریر. کیمسه دنیا نعمت‌لرین اؤزونه ایسته‌یرسه‌ده، آنجاق دنیا باغینین بار- بهره‌سینی یالنیز اؤزونه یوْخ، اؤزگه‌یه‌ده آرزو ائله‌ییر. لاکن بئله بیر تنقیدین دیلی، هردن بایاغی و معمولی اوّلورسادا، هردن‌ده طنز شکلینده اؤزونو گؤستره بیلیر. طنز تنقیدچی‌سی، آجیلیقلارین اوْلمامازلیغینی، گولمه‌جه دانیشیق و سؤزلرله بیان ائدیر. دوْداقلاری گولوشه آچارکن، گؤزلری‌ده آغلاماغا سالیب و آجیلیقلاری آرادان آپارماق آرزوسون اوره‌یینده یاشادیر. بئله بیر یازیچی یالنیز اؤز اوره‌یینی یوْخ، بلکه‌ده هامیینن اوره‌یین آچیق دیله‌یرک، عمور یوللارین کولسوز- تیکانسیز، بو گونوشن، گله‌جه‌یی آیدین ایسته‌ییر. اوّ دوْداقلار قونچاسینی بوزوشوک، آلین‌لاری قیریشیق، اوره‌کلری حسرت‌لی ایسته‌میر. بلکه‌ده چیرکینلیک‌لره خوْر باخار ایکن گولوش‌لر ایچینده گؤزیاشی تؤکور. دئمک، بو دویغو و بیلگی بو کیمسه‌ده اوْلمور. اوْنا گؤره‌ده بئله بیر دنیانی تصویر ائدن، خالقین اوْدلو- آلوْولو اورمایی ایله اؤز اوره‌یین بیرگه چیرپیندیران هنرمندلر ایشی‌دیر.
«حمید آرش‌آزاد» تبریز ادبی مکتبینین طنز شاعیری- یازیچی‌سی‌دیر. اوّنون هر بیر آجیلیغی قارقییان، گونده‌لیک چتین‌لیکلری اوزه چکن شعرلری، آذربایجان طنز مکتبینین زنگین واراقلارین آرتیرماقدادیر. بیر گون باهالیغی، بیرگون حاقسیزلیغی، بیرگون‌ده اجتماعی چتین‌لیکلری اینجه- اینجه مصراع‌لاردا تصویره چکیب، گولمه‌جه‌لی سؤز مورواری‌لارین مونجوق- مونجوق بیت‌لره دوزور.
گؤزه‌للیکلری ایسته‌ییب، پیسلیکلری آرادان گؤتورمک ایسته‌ین حمید آرش، یالنیز شعرله یوْخ، بلکه نثر ایله‌ده اوره‌کلری سیخیتی‌دان، دوداقلاری بوزوشمه‌دن، گؤزلری آغلاماقدان، یاناقلاری سارالماقدان اوزاق ایسته‌یر. او، چیلپاقلاری گئییم‌لی، آج- یالاواجلاری توخ، ایشسیزلری ایشلی ایسته‌ییر. آرش صابر، معجز، یالقیزکیمی طنز شاعیرلرین سیراسیندا دایانمیش، ایشیق ساچان شاعیردیر. اوْنا گؤره‌ده اوّلدوقجا اوْخوجولار طرفیندن قارشیلانیب، تقدیره لایق گؤرونموشدور. او، ائل اوره‌یینده یاشایان یازیچی و شاعیرلریمیزده‌ندیر. گؤردویوموز کیمی، اوْنا بیر، ایکی طنز سئوه‌ر یوخ، بلکه‌ده بیر ائل ده‌یه‌ر وئریر.
من، بو انسان سئوه‌ر شاعیری اوره‌یینه باسان ائله قوشولوب، اونو اوره‌ییمه باسیب، شنلی گونلرین، ایشیق گله‌جه‌یین دیله‌ییرم.
آرش
گولدوره- گولدوره آغلاتدین منی
کؤنلومو اوخشادین سؤزونله آرش
آهیما قاتیبسان بو دومان، چنی
قلبیمی یاخیرسان کؤزونله آرش
***
شیرین‌لی گونلری آجیدان گئجه
لاغ اوْلور یازیندا باخ، اینجه- اینجه
اوچوروم بو داغی چیخیرسان نئجه؟
چکیرسان چوخلارین اؤزونله آرش
***
دردیندن سئل اوْلور گؤزومون نمی
«چایلیِ»نی بورویور دنیانین غمی
دؤنئیدی گولشنه بوتون عالمی
اوخویوب گولئیدیک سازینلا آرش
برجسب : | ايميل: news@.ir | شماره پيامک:000 |
|