دام اوچوبسا باشیما، غم یئمه، دیوارکی قالیر
هامیلار مندن اوزاق گزسهده، دلدارکی قالیر
یوخدو پول، تاکی وئرم دلبریمین مهریهسین
قالماییب اؤز باشینا، بیر دلیلی وارکی، قالیر
هره، بیر عنوانایله ارکِ علیشاهی ییخیب
نگران اوْلما، بالام! بیردنه دیوار کی قالیر
سُنّتی قهوهخانا اوْلسادا کوردشت حامامی
تاریخه حؤرمت اوچون، اسکی تون- آنبارکی قالیر
«ارزه خاطر»- دئمهیین «هرزادیمیز صادر اوْلوب»
اگنیمیزده هلهلیک، کؤهنه بو شالوار کی قالیر
سرمایا صاحبی، هم مغزی اوْلانلار قاچیری
قوْی گئده پولدا، بئیینلرده، قارینلار کی قالیر
غربده چونکی «آزادلیق» وار، هامی مُعتاد اوْلوب!
ساخلاییبدیر بیزی گردنده بو افسارکی قالیر!
یوْخسولوق چون قاپیمیزدان کسیب ائل- طایفا آیاق
قاپینی دؤیمهیه هردن، بو طلبکارکی قالیر
شوکولات وارد اوْلور، بوغدایا قالمیر، پولوموز؟
ناامید اوْلما، چورک یاپماغا چؤودارکی قالیر
قوْرخما بانکلار دوْلا، یئر قالمییا هئچ پوللارینا
دوْلدوروبسا پولون هر اؤلکهنی، بولغار کی قالیر
نگران اوْلما بیزیمده پولوموز یوْخدور اگر
ائودهکی اسکی جئجیم، کوچهده سمسارکی قالیر
برق تئز- تئز کسیلیر یای گونو، بوزسوز قالیریق
داغ باشیندا هله اوْ قیشدا یاغان قار کی قالیر
اینجارین یوْخدو، سسینده باتیب، «آرش»! بیلیرم
گئنه حق سؤیلهمهیه الدهکی خودکار کی قالیر
برجسب : | ايميل: news@.ir | شماره پيامک:000 |
|