هر بیر اینسان گولوش ایله گؤزل اولار
گولوش اولان اورکلرده سئوگی دولار
سئوگی دولار کدرلرین کؤکون یولار
آرش آزاد تبسّمه بیر شانی دیر
دونیامیزی گؤزلله دن اینسانی دیر

گؤزل لرین گؤزلینه قوناق اولموش
گؤزل لرین گؤزلیندن ایلهام آلمیش
گؤزل لیگه بزک اولوب دیله سالمیش
سئونیج دونیاسینا او عاشق اولدی
اونچون گؤزل لیگه یاراشیق اولدی

عؤمور بویی سئوینجی او حق سؤیله دیر
نیفرت اولموش عصریمیزه گؤر نئیله دیر
اورک لری سئوگی ایله فتح ائیله دیر
سؤزلری هر آن سئوینج داشییاجاق
یاشاییبدیر، یاشاییری، یاشییاجاق

قارانلیغا دان یئری تک نور ساچیبدیر
سعادتین عالمینه قول آچیبدیر
او جنته یئتیشمه گه یول آچیبدیر
بؤیله اینجه دویغولاری آنمالی ییق
قارانلیغا گئدن فیکری دانمالی ییق

بؤیله دویغو بؤیله فیکیر قالمالی دیر
دوشونجه لر اوندان ایلهام آلمالی دیر
هر آن اونو آنمالی ییق هرگون یادا سالمالی دیر
گولوش یعنی سئوینج ایله محبت دیر
سعادتین سیرداشی دیر خوش نیت دیر
الیاس امیرخانی