یئدی. ایله دؤندو مرحوم «حمید آرش آزاد» ین بیز لردن آیریلیب ابدیته قاووشماسی ، لاکین بو آیریلیق هئچوقت و هئچ زمان اونون آدینی ویادینی اورک لردن سیله بیلمه ییب و سیله ده بیلمز،
چونکو «آرش» اؤزل یاشاییشی ایله ، قالارغی اثرلری ایله او قدر اورک لرده وتوپلوم دا اوزونه یئر آچیب کی زمان اؤتدوکجه یادلاردان سیلینمه سی یوخ بلکه چوخراق تانینماسینا سبب اولوب و ائل لر آرا اثرلریله آدی دیل لرده و یادی اورک لرده ،شعرلری ایسه ائل لرایچینده یاشاماقدا اولاجاق، یئدی ایل یوخ بلکه یئدی یوز ایل دن سونرادا آرش ین یازدیغی اثرلر و قوشدوغو شعرلر دیل‌دن دیله ائل‌دن ائله یاییلیب میرزا مؤجز شبستری و میرزا علی‌اکبر صابر کیمی آرش‌ین بونداندا آرتیق تانینماسینا سبب اولاجاقدیر،
منجه آرش‌ین هونریدن ویارادیجیلیغیندان اوستون منییتی واؤزل لیگی وار ایدی کی قوجامان بیر چینار آغاجی کیمی هر یئلین اؤنونده باش ایمه‌دن، سارسیلمادان، هر درده، عذابا دایاناراق یاشاییب یاشاتماغا و یاتمیشلاری غفلت یوخوسوندان اویاندیرماغا چالیشیردی،
و بعضی قورخاق‌لار ویالتاق‌لار کیمی زمان یئل ایله اویناییب وگونده‌لیک ایچی بوش مووضولارلا اؤزونه شهرت قازانماق دونیا مالینا هر یولدان اولورسا ال تاپماق دئییلدی، آرش آزادلیغا اورکدن وورغون واؤزگور یاشاما هر بیرزادان چوخ اؤنم وئرن و ایسته دیگی وسئودیگی کیمی چوخ یاشاما یوخ دوز یاشاما باغلی اولان بیر اینسان اییدی،
آرش مالی، دولتی و شهرتی و هرنوع مقامی گئچری، پوچ و یئرسیز ساناراق تکجه اینسان حق‌لرینی و تمام دونیادا اؤزگورلوغو عدالتی آرایان وآختاران و نهایت بوتون اینسان‌لارین خوشبخت‌لیغا چاتماغینی آرزو ائله‌ین بیر اوستاد طناز شاعیرایدی، اویله کی اؤزو ابدی قالاجاق شعرینده دئییر،
مرامیم اینسانین آزادلیغی حریّتی دیر،
من اؤزوم تورپاغا گئتسم‌ده مرامیم قلاجاق،
یولچودا یوخسادوام، یول داکی واردیر، نه غمیم،
آرتاجاق یولچولار، البتهّ دوامیم قالاجاق،
آرش ظولمون حق سیزلیگین ریانین، یالانین و ساده اینسان‌لاری حیله و کلک‌له آتداتمانین نه قدر پیس و منفور اولدوغونو دریندن دوشونوب اینسانین بئش اون گونلوق دونیادا قوناق اولدوغونو آنلاییب اؤلوم دن چکینمه‌ین و قورخمایان تنقیدچی ایدی اؤزونون یوخ، ائل‌لرین قایغیسین چکن ایدی «امیربازاری اود توتسون منه بیر دستمال اولسون» دئینلردن دئییلدی، آز یاشا، آزاد یاشا، انسان یاشا، رحمتلیغین همیشه دیل ازبری ایدی، نجه کی، بنده کی گئتدیم عنوانلی شعرینده دئییر:
فکر ائتمه دوشر ائل خطره، بنده کی گئتدیم،
یاتوش گلر عقرب قمره، بنده کی گئتدیم،
هم شعرایله هم نثرایله، من طنز یازاردیم،
گئتمز بو اثرلر هدره بنده کی گئتدیم،
آرش دوغرودان دوغروسونا بونا واقف ایدی کی اصیل اؤلوم اینسانا او زمان دیر کی حیوان سایاق باش آشاغی سالیب، یه ییب ایچمک‌له نئچه ایل دونیادا یاشاییب سونرادا اؤزوندن بیر دوزگون اثر بیراخمادان ویاشاییشین نه اولدوغون بیلمه دن هر بیر زاد دان ال اوزوب تورپاغا جومولا،
اوآج گؤزلولری و دونیانی یئه‌ییب دویمایانلاری طنز قلم ایله بیزله یرک کؤنول آدلی شعرینده دئییر،
دونیانین نعمت‌لرین، هرزادکی وار، ایستر کؤنول،
اللی تن «یورو»، اوتوزخاروار دولار ایستر کؤنول،
چون قناعت اهلی دیر، حقّیندن آرتیق ایسته مز،
دونیادا، بیرده بهشت ده هر نه وار، ایستر کؤنول،
یئری جنت، روحو شاد اولسون، اسفهلانی
حسن حسن‌پور (دوزه قول)

آرش بیلیریک بیزلره‌ده بویله سفر وار،
دیل آچ دئه گؤرک سونکی جهاندا نه خبر وار،
هم حوری دئییرلر همی دوزخ همی یانماق،
دئه کیم لره حوری، کیمه ایشکنجه شرر،وار؟
هانسی یولو گئدسک اولاریق رستگار آنجاق،
سن ده بیلیریک هرایشه چون چشم بصر وار،
جنّت‌ده دئییرلر دایانیب حوری، الینده،
بوشقاب دولوسو میوه‌لری عین شکر وار،
یئه میوه‌لرین اؤپ یاناغین، دیشله دوداغین،
خلّآق جهاندا گؤزلیم گؤر نه هنر وار،
بیرده دئه ییلیر خازن دوزخ دئوه اوخشار،
بیر الده توتوب اود، او بیری الده تبر وار،
بعضی‌ده دئیر یوخ بئله زاد جومله یالاندیر،
بو باره‌ده اینسانلار آرا نئچه نظر وار،
جنت اورادیر صلح و صفا حکم ائدیر آنجاق،
دوزخ‌ده او یئر دیر کی یالان، فتنه و شر وار،
انصاف‌دی عدالت‌دی صداقت‌دی مروت،
جنت‌ده بو اعمالی یاپانلاردان اثر وار،
آرش دیله گلدی بو سؤزون وئردی جوابین،
بوردا دئدی ظالیم‌لر اوچون خوف و خطر وار،
ظولم ائیله‌مه اینسان حقوقون ائیله رعایت،
گلسن (دوزه قول) بوردا گؤررسن کی نه‌لر وار.