نئچه ایل دیر هامیلیقجا دویغوسال بیر حوزونتونو یاشاماقدایق. بعضی اینسانلارین یاشام سوره سیندن آیریلماقی ائل، خالق و مدنی وارلیق ایچین داها آغیر اولور و گئتدیکجه یئرلری داها آرتیق اولاراق بوش گؤرونور. آمما آیریلیق هامی ایچین یاشامدان قیریلماق دئییل بلکه ده داهادا دویغولار قازانماقدیر.
بئله لیکله اولو اوستادیمیز «حمید آرش آزاد» تایسیز لیریلکاچی گوندمین ان دگرلی یازار شاعیری بیزدن آیریلدیغی ایللر سیراسیندا داهادا تاننیمیش و اوزون ایللر خالق اوره گینده یاشامینا یئر آچمیشدیر. من بئله دوشونورم کی داهادا اوزون ایللر بویو گونده لیک بؤیومکله قالارگی اینسانلار سیراسیندا یئر توتوب و تاریخ بویو یاشایاجاقدیر.
من بو ایل، ایل دؤنوم یازیسینی کئچن ایللرین ترسینه، چوخ سئوگی و سایغیلا تورکجه آنادیلیمزده یازدیم و اصیل نه ده نی بو اولدوکی اورییمدن گلدی کی اوستادین اؤز دیلیجه طنز بیر شعیرله اونو عزیزله میش اولوم و حقیقتا یئری نین بوش اولماسینی داها آرتیق اولاراق یادا سالمیش اولوم.
اولابیلرکی بیزیم یازیلاریمیز اونو اولدقجا دگرلندیره بیلمه یه و قلمیمیزین گوجو اونون آدینا آرتیق سئوگی و سایغی قازانیب یاناشدیرا بیلمه یه. آمما چوخ سئوینیریک کی جناب آقای سیامک آرش آزاد هر ایل بو گؤزل آنیم تؤره نیله هامی نین دویغولارینی بیر یئره توپلاییر و یادیمیزا سالیرکی هله ده واریق. عشق اولسون.
خداونده گیلایه
کیمده وارسا خداوندین موبایلی
وئرسین منه هارایلی یام هارایلی
درد باشیمدان آشیب گئدیر هاردادیر
باخسین گؤرسون. یازیق کؤنلوم داردادیر
فیس بوکا نه نه ایمیله گَلمه ییر
ایسته ییمجه آنلاریمی ائرته لیر
سان بوراخیب بو دونیانی باش باشا
رحم ائله میر قاش قاشا نه باش باشا
پی وی سینه گئتدیم جاواب چیخمادی
ال اوزاتدیم بیر آن توتوب سیخمادی
آی دی وئریدم نومره وئردیم اونا من
سانکی داها یئتیشمیشم سونا من
نه دن بیزی باش باشینا بوراخیر
مگر گؤرمور یئر اوزونده قان آخیر
دونیا اهلی ایتیریبلر اؤزلرین
چاشدیریبلار اورکلرین سؤزلرین
مئهربانلیق نامردلیگه ییخیلیب
صداقتلر اورکلرده سیخیلیب
دونیا یانیر اود ایچینده هر آنی
بیر توپلاسین آخان ناحاق بو قانی.
او باشلاردان سفئه دلی باشدادیر (ترامپ)
کندیسی ده منیم ده دم یاشدادیر
دانیشیغین اوتوروشون بیلمه ییر
اؤز گؤزونون قان یاشینی سیلمه ییر …
خداونده دئیین مگر یاتمیسان
دونیامیزی دلی لرله قاتمیسان
سندن بیزیم باشقا ایسته ییمیز وار
گه ل آی الله دونیا خالقینا اول یار
کؤنلوموزده وار یوخوموزسان الله
آز اولساقدا سن چوخوموزسان الله …
زنگ آچیرام هر بیر گئجه گوندوزی
یوخ مشترک سؤیله ییر تئلفن قیزی
بوراخمیسان اینجیمیسن یا بیزدن؟!!!
ائشیت منیم سه سیمی سن تبریزدن
بیر مئساژ آت قوی بو کؤنلوم دینجه له
واخت آییر سن بیزلری بیر اینجه له
بلکه بیر آپدئیت ائده سن بیزلری
دوز تانییاق سندن اولان ایزلری
هر بیر کسین یانیندا جوت گوشیسی
سیملی سیمسیز قولاغلیغی گوشیسی
بئش اون خط وار هر بیر کسین جیبینده
عاغلی چاشیر عاغیللی نین بیجینده
آکانت لار تئلگرامدا داد ائیلیر
یادلیغینان دوست دوشمنی یاد ائیلیر
سند منیم تک یازیق اولدون الله
گوللر کیمی سارالدین سولدون الله!!!؟
بیر موبایلیم بیرجه خطّیم وار منیم
سنسیز اولسام دونیام اولار دار منیم
هاییما های سه سیمه سه س وئرگینن
گه یاخینا بیزه نفس وئرگینن
سن سئوگیلر سایغی لار آللاهی سان
جوت دونیادا قایغی لار آللاهی سان
سنسن اینان وارلیغیمیز دونیادا
یئتیشگینن بیزده اولان فریادا
عصبله نیب آتما بیزی گؤزوندن
دای چیخماریق اینان سنین سؤزوندن
سنی تاپساق دونیا دوزه لر بوتون
خوش یاشاریق دونیامیزین هر جوتون
سندن آلیر کؤنلوموز عشقین دادین
کؤنلوموزده قویما قوروسون یادین.
اکبر رضایی مولان
برجسب : | ايميل: news@.ir | شماره پيامک:000 |
|