یوْخسول گؤروب اوْ یار منِ زاری، بَگنمه‌دی
مین گول دریب، آیلاقلادی، خاری بَگنمه‌دی
کؤنلوم ائوین خرابه قوْیوب بیرجه حمله‌ده
صبری تالانا وئردی، قراری بَگنمه‌دی
قاش- کیرپیک ایله سینه‌می یوز یئردن اوْخلادی
سالدی آیاقدان، اوْندا شکاری بَگنمه‌دی
لامپا چیراغی اوزلو چیخیب، قالخدی رف‌لره
قیرجاندی چیلچیراقلارا، شاری بَگنمه‌دی
بر چیمدیک ات گلیب جانینا، باخ افاده‌یه
کوْر بوببو شیشدی، چشمِ خماری بَگنمه‌دی
قیرت آت بئلینده چیخدی اؤزوندن کئچل گده
آهو باخیشلی، نازلی نیگاری بَگنمه‌دی
ائششک‌دن ائندی، بنزی مینیب، گلدی جؤولانا
طیّاره ایله گزدی، قاطاری بَگنمه‌دی
بیر گون آتاردی بیر قیرنا گوللـه، ایندی گل
گؤرکی، فرانکی، مارکی، دوْلاری بَگنمه‌دی
قلب پول اؤزون بازاردا گؤروب، مشتبه دوشوب
ویترینده ایرمی دؤرد عیاری بَگنمه‌دی
عؤمرونده اییده دادماییب، ایندی موْزو تیخان
نارگیلی دورتدو قارنینا، ناری بَگنمه‌دی
شیطان سایاق «منم» دئیه‌رک اوچدو گؤیلره
اوْ سرورِ براق سواری بَگنمه‌دی
پارتی گوجودی ایله چاتدی بؤیوک منصبه الی
اوْندان سوْرا بو خلقِ فکاری بَگنمه‌دی
بایقوش کیمی، فقط اولاماغی ائدیب پئشه
قارغانی بَی قاییردی، هَزاری بَگنمه‌دی
بیرجه اؤزون چیخیب، هامی‌یا اؤلمک ایسته‌دی
هئچ بیر اوغورلو شعری، شعاری بَگنمه‌دی
هئچ نانجیب کئفین گؤروم آللاه سازاتماسین
وقت اوْلدو سارماشیق‌دا چیناری بَگنمه‌دی