به مناسبت چهارم دی ماه سالروز تولد حمید آرش آزاد

صابر دؤوران
رنجی تبریزی
چک کمانین زهین ائت سینه‌می شان- شان، آرش
آلتمیش ایل‌دیرکی ائدیبسن بیزی حیران، آرش
سنله سؤز- صحبتین آیری دادی وار عالمده
ائده‌سن آغلایانی طنزیله خندان، آرش
سنده یوخ، یوخدور، آچیق‌دیر سنین ازبس فکرین
ائیله‌سن هرنه‌کی موشکول اوْلا آسان، آرش
نَفَسین عیسیِ مریم‌کیمی اعجاز ائلی‌یَر
وئره‌سن اؤز نَفَسین‌له اؤلویه جان، آرش
قلمین الده‌ سنین، گاه یارادیر یوزلر اثر
گاه دؤنوب شمشیر اُولوب اَلده، توکور قان، آرش
تاپماسا دردینه هر کیمسه بو دنیاده علاج
ائده‌ر اشعارین‌ایله دردینه درمان، آرش
ادعا چوخلار ائدیر بوردا غزل یازماقدا
اولا بیلمَزله قاپوندا هَلَه دربان، آرش
آلتمیش ایلده بئله گئتسه، هَلَه واردیر ایشیمیز
گئجه- گوندوز نئجه تودلاخ باساجاقسان، آرش
وئرمیرم قوْلتوغونا بو سؤزوله قارپوز، اینان
سن‌سن ایندی دئییره‌م صابر دؤوران، آرش
قدمین هریانا قویسان، وئره‌س خلقه صفا
اِئیله‌سن کُوللوگو بیر گوللو گولوستان، آرش
«رنجی»‌مین لرچه غزل یازسادا عمرونده اگر
اُولا بیلمه‌ز سنه تای مرد سخندان، آرش