یاخچال‌لار بوزلو اوْلار

گؤی‌لر اولدوزلو اوْلار

«اورمو» گؤلو قوروسا

اؤلکه‌میز دوزلو اوْلار!

*

قوربانینام اوستاندار

سولار اوْلورو بُخار

علاج اوْدور قوراسان

اللی – آلتمیش سمینار!

*

گل بیر تدبیر گؤتوره‌ک

بو گؤله سو یئتی‌رک

باشماق، قالی، کاغیذ تک

چین‌دن سودا گتیره‌ک!

*

قوراقلیق آتیب اوْخو

قورودور واری- یوْخو

عزیز مسؤول‌لاری‌دا

آپاریب شیرین یوخو!

*

قوْنشودور ایکی اوستان

بیری لعل، بیری مرجان

مسؤول‌لاری چالیشسا

بو گؤل اوْلار نمکدان!

*

کئچدی قیش، گلدی باهار

داها بس‌دیر انتظار

مدیرله ساغ‌لیغینا

بوردا بیر «کویر»‌ده وار!

*

نه گره‌ک غمه دوْلماق؟

غصه‌دن، درددن سوْلماق؟

بلکه مسؤول‌لار دئییر:

«یاخشی‌دیر دوزلو اوْلماق؟!»