آرشین دردی بوتون، دردِ بو ملّت‌دی بیلین

هر نه سؤیلیر هامیسی، منطق و علّت‌دی بیلین

قورخماز اصلان اولوب او، حاق مئشه‌سینده سؤز اوچون

چونکو قورخماق پئشه‌سی بیر یئکه ذلّت‌دی بیلین

او دنیزلر درینینده صدف ایچره یاشایان

تایی یوخ میرواری‌دیر، پُربها قیمت‌دی بیلین

اؤزونو ساتمادی هئچ لحظه‌ده پول و مقاما

پول، مقام اولماسا دوز، دونیادا نقمت‌دی بیلین

شهرت دونیایا دال دؤندریبن یوخ دئدی او

آرشه آزاد اولان، آرشه عزت دی بیلین

باخین اعمالیویزا، ایلین اوز فیکر یویزی

اصلی منزل اونا چوخ دینجدی، راحت‌دی بیلین

او صداقت باغی‌نین، یاخشی گوزه‌ل بیر گولودور

چوخلاری واردی بو ایشده، ولی مین خط‌دی بیلین

چوخلارینا وئریلیب خلعت و تندیس و انعام

آرشین وجدانی بیر گوهر و خلعت‌دی بیلین

بو دوعامدی «صمد»ه «آرشه» اولسون رحمت

تولکولیک ایلینه نفرین و لعنت‌دی بیلین

حاق یولون کروانی هر یاندادا قویلانسا یقین

اونلارین مسکنی فردوسیله جنت‌دی بیلین

حاق سؤزون خالیقی اؤلمز، نه قدر واردی جاهان

چون اونون پول دئیلی نیتی خدمت‌دی بیلین

هرکسین پول اولا ایمانی او یاددان چیخاجاق

بو کثافت ضعیف ایمانلارا آفت‌دی بیلین

باخماین اموالا، منصب‌لره، شهرت‌لره سیز

ظاهری خالدار ایلان، باطنی محنت‌دی بیلین

حاق یولوندا دؤیوشن، ئولسه یئتر اؤز یارینا

بو اؤلوم او ئولنه، شهدیله شربت‌دی بیلین

اؤلمه‌یب، اؤلمیه‌جک آرش ایله ـ آرشه تای

دین و ایمانلاری چون، اونلارا ثروت‌دی بیلین

افتخار ایلیرم «غمدانا» او اوستاد اولا

اونون اوستادلیغی والله منه رحمت‌دی بیلین