یاغیش

حمید آرش آزاد

عزیز یاغیش، جان یاغیش

سنه جان قوربان، یاغیش

آزجا قالیر الینده‌ن

چکه‌ک «الامان» یاغیش!

***

اوچ- دؤرد داملا داماندا

سئل آخیر خیاوان‌دا

اوچ‌گون ده‌کی یاغمیرسان

سو تاپیلمیر هئچ یاندا

***

یاغینتلی ائوی ییخیر

قوراقلیق جانی سخیر

هر ایکی بهانه‌یله

قیمت‌له عرشه چیخیر!

***

ائل سو اوچون تله‌سیر

لوله‌لرده یئل اسیر

سنی بهانه ائدیب

بیری‌ده برقی کسیر!

***

یاغیش، اوزون آغ اوْلسون

سولارین چایلاق اوْلسون

گله‌ن ایله چاتماساق

سنین باشین ساغ اوْلسون!

***

چؤل‌لری قورودورسان

شهری سئله توتورسان

سن‌ده، مسؤول‌لار کیمی

کندلری اونودورسان

***

سویو ییغماق هُنردیر

بوْشلاماق دردِسردیر

یاخشی باخساق، گؤره‌ریک

اصلی کمبود «جوهر» دیر!