«سیما»- میز گؤستریری تکجه ایلان‌دان- زاددان

گؤروروک «راز بقا»- سیندا قابان‌دان- زاددان

شهردار مدح یازان شاعره هئی سکّه وئریر

شهرده سالمیری اصلاً خیاواندان- زاددان

خیاوان آرخینا باخ، دوم- دورو سو یوْخدو، ولی

زیر- زیبیل چوْخ گؤرونور، بیرده سیچان‌دان- زاددان

وئردی کاخ وعده‌سی اوْن ایل بیزه مسکن وزیری

راضی‌ییک ایندی وئره ایشگه دالان‌دان- زاددان

انتخابات کی یاخین‌لاشدی، یاغیر دام- باجادان

باهارین یاغمورو تک وعده، یالان‌دان- زاددان

بیر یالان‌لار کی، چکنمز اوْنو هئچ داش- تره‌زی

بلکه باسکول چکه بیلسین، یا قاپان‌دان- زاددان

ساتدیق هر بیرزادی، شهریّه‌نی تقدیم ائله‌دیک

اگنیمیزده داها یوْخ بیرجه تومان‌دان- زاددان

ائوله‌ننده گلیری خوْنچادا کؤینک- کیراوات

ولی اصلینده اوْلور نوْختا، پالان‌دان- زاددان

بیر ایل اوّل‌ده، خانیم سؤیله‌دی: «قوربانین اوْلوم»

اوْتوز ایل دیرده، دئییر چوْخلو یامان‌دان- زاددان

گؤرمه‌دیک دونیادا بیزلر بیر اوْتاق، بیر دهلیز

گؤرمه‌ریک حشرده ده باغ ِ جنان‌دان- زاددان

اوْردا دا حوری‌نی- غلمانی فلان کس گؤتوره‌ر

بیزه خوْرتدان یئتی‌شر، یا کی خوْخان‌دان- زاددان

قاپساییب هر ایکی دونیانی زیرک لر، یئیه‌جک

بیزه آنجاق چاتاجاق بیر تیکه نان‌دان- زاددان

منفعت‌لر گؤتورور مدح یازان شاعرلر

یازیق «آرش»ده گؤرور تکجه زیان‌دان- زاددان