به یاد استاد آرش آزاد
بئش اونجه آرامیزدان گئتسهده
دونیادان ال اوزوب سفرا ایئسهده
اونون اولوموندن ایللر اوتسهده
هله اورهکلره ایزی وار اونون
هله ائل ایچینده سوزی وار اونون
*****
او ائلین اوغلودور داغلار آشسادا
داغلار آشیب بیزدن اوزاق لاشسادا
توپراقلار آلتیندا ایندی یاتسادا
هله اورهکلره ایزی وار اونون
هله ائل ایچینده سوزی وار اونون
****
او خالقین دردینی اوز دردی بیلن
آغلار گوزلرین یاشینی سیلن
ائلین اورهک دردین اوجا سسلین
هله اورکلرده ایزی وار اونون
هله ائل ایچینده سوزی وار اونون
****
او جهلین ریشهسین کوکوندن قازان
او ظولمه، ظلمته قارشی، سوز یازان
او «ایرینی ایری، دوزی دوز» یازان
هله اورکلرده ایزی وار اونون
هله ائل ایچینده سوزی وار اونون
****
سوزونده هم گولوش هم غم واریدی
او شعر او لکهسینده طنز استادی ایدی
“تعریف و مدح» یازماق اونا عاری ایدی
هله اورکلرده ایزی وار اونون
هله ائل ایچینده سوزی وار اونون
*****
ائلیمین دردینی بیلن هارداسان
آغلار گوزلریمی سیلن هارداسان
گولدورن، آغلادان شاعر هارداسان
هله اورکلرده ایزی وار اونون
هله ائل ایچینده سوزی وار اونون
****
بیر گون بو ائل سنه هیکل قوراجاق
اونون چئورهسینده گوللر آچاجاق
ائل ایچینده آدین سانین قالاجاق
هله اورکلرده ایزی وار اونون
هله ائل ایچینده سوزی وار اونون
******
دور آیاغا آرش گور دوستلار گلیب
دوست آشنالار سنه گل چلنک هوروب
سنین سوزلرووی حقیقت بولوب
هله اورکلرده ایزی وار اونون
هله ائل ایچینده سوزی وار اونون
تبریز ـ تابستان ۹۴ ـ محمدحسین احمدزاده
برجسب : | ايميل: news@.ir | شماره پيامک:000 |
|