باخاندا دلبریمه، کؤرپه بیر مارال‌دیر لاپ
اوْ شهلا گؤزلرایله، خوْش باخار غزال‌دیر لاپ
اوْنو، تک آیلیق آلان گون زیارت ائیله‌یه‌رم
اوْروج توتانلارین آختاردیغی هلال‌دیر لاپ
هر آی‌دا، تکجه اوْ بیر گون‌ده خوْش باخار اوزومه
اوْگون‌کی کئچدی، ایشی دعوا، قال ماقال‌دیر لاپ
یارین یانیندا، منیم صفره یئنمیش اعتباریم
نه اعتبار دئییم؟ اوزدن ایراق، ریال‌دیر لاپ
دئدیم‌کی، پاک یاشاییم، اوْلماییم فیریلداقچی
بو پاک‌لیق عؤمر بوْیو، بوْینوما وبال‌دیر لاپ
دوشوندوم علم- ادب، انسانی ائده‌ر خوشبخت
حاییف‌کی، قانمادیم اصلاً بو خام خیال‌دیر لاپ
زمانه میزده بیری باش قوْشارسا وجدانینا
اوْنون ترقّی‌سی، گون گؤرمه‌سی محال‌دیر لاپ
بو اؤلکه‌ده، اوْ کسین‌کی آزاوْلدو پول- پاراسی
هُنرده، فنّ‌ده رستم‌ده اوْلسا، زال‌دیر لاپ
اوْ کس‌کی دلاّل اوْلوب، مخلوقون جیبین سوْیدو
بوجور زمان‌دا، بئله یئرده ایده آل‌دیر لاپ
سالین بیر آزجا اوزه‌رلیک‌کی، دگمه‌سین گؤز- مؤز
باخین بو موفته‌خورون قارنینا، خارال‌دیر لاپ
سحر گئدیر سوْلا، آخشام دؤنوب، اوْلور ساغچی
دوْداقدا زورنا‌دیر، آلسان اله، قاوال‌دیر لاپ
بو تولکو، دایمی قورد تک دومانلیق آختاریری
اوْلاندا اوْرتا شولوق، سئودیگی مجال‌دیر لاپ
بیرآزدا انتقاد ائتسه‌م، یاخار منه بهتان
دئیه‌ر: «لاییک، سکولار، هم‌ده لیبرال‌دیر لاپ»
گئنه چیخیب جیزیغیندان آیاق‌لارین، «آرش»
دیلین بیرآزدا اوزانسا، قانین حلال‌دیر لاپ
دیدگاهتان را بنویسید