یار خیرداجا اوْلسا، قوزه جئیران اوْلار، اوْلماز؟
جان وئرسن اوْنا، سئوگیلی جانان اوْلار، اوْلماز؟
سن وار، یوْخو وئرسن ماتیکه، یار لبه سورتسه
بیر جوت لوْپویو لعل بدخشان اوْلار، اوْلماز؟
بایراملیغی دوْولت چوخادیب، ائتسه یوزاللی
دیبده فاطی یا بیر تزه تونبان اوْلار، اوْلماز؟
نشریه مدیر مسوولی اوْلسا متملّق
نشریه سی یوز رنگ ایله الوان اوْلار، اوْلماز؟
تعریف و تملّق چوْخ اوْلا، انتقاد آزجا
مسوْول لاریمیز شاد و خرامان اوْلار، اوْلماز؟
سرمایه سی بیر یاغ، بیر ایپک دستمال اوْلورسا
دوخسان فاییزی آگهی- اعلان اوْلار، اوْلماز؟
شورا رئیسی، شهرداری دوکتور اوْلور کن
تبریزده بوتون دردلره درمان اوْلار، اوْلماز؟
مسوول لاریمیز ذرّه جه آرتیق چالیشیرسا
تاریخی اثرلر داها ویران اوْلار، اوْلماز؟
آلتی وکیلین هر بیری بیر جورهاوا چالسا
هر بیر چتین ایش، تئز دوْنوب آسان اوْلار، اوْلماز؟
بیر بئله چالیشماقلا، فقط هفته ده دورد گون
اوستانداریمیز عازم تهران اوْلار، اوْلماز؟
یوزلرله موبایل ایله مدیرلیک ائله ین وار
بس اوستانیمیز روضه ی رضوان اوْلار، اوْلماز؟
تبریزده “صدا- سیما” چالیشا بوسایاقدا
بونجا هنره دونیالار حیران اوْلار، اوْلماز؟
برنامه ارین گر گوره امریکا، اروپا
فرهنگی تهاجم ده پیشمان اوْلار، اوْلماز؟
گر وعده- شعار تولید اوْلا کامپیوترله
ایراندا ترقی یوْلو سهمان اوْلار، اوْلماز؟
“آرش” آجی نقدی ائله طنز ایله شیرین
خلقین دوْداغی گول کیمی خندان اوْلار، اوْلماز؟