هر نئچه کاندیدا اوْلا، بنده حمایت ائیله‌رم
تک- تکینه گونده گئدیب، عرضِ ارادت ائیله‌رم
سحر، بئش- اوْن ستاد گزیب، آخشامی اللی‌سین- یوزون
گئجه بئش- آلتی یوز یئره گئدیب، اقامت ائیله‌رم
بوردا ستاد رئیسی‌یم، باشقا ستاددا چای وئره‌ن
فرق ائله‌مز، هایان گله، دوْیونجا خدمت ائیله‌رم!
اله آلاندا بیر «قاوال»، چالاندا یاخشی «زورنا» یام
ساغ‌ایله یاخشی دوْست اوْلوب، سوْلا رفاقت ائیله‌رم
چپیک چالاندا، وار الیم؛ دُعا گره‌کسه‌ده، دیلیم
فیشقادا ایسته‌سز، چالام؛ دوروب، قیامت ائیله‌رم
«اصلاح» اوْلا، «اصول» اوْلا، هم «طلب»‌ام، هم‌ده «گرا»
چون‌کی یئله اینانمیشام، اوْندان اطاعت ائیله‌رم
سئچگی گونو گله‌ن زمان، محلّه آغ ساققالی‌یام
بئش- آلتی حؤوزه‌نی گزیب، رأیه نظارت ائیله‌رم
نتیجه‌نی وئره‌ن زمان، کیم چیخا، یوْخ تفاوتی
بنده، تئز عرضِ تبریکی، همان اوْ ساعت ائیله‌رم
بئش- اوْن غزئت‌ده تبریکیم، ائرته‌سی گون چاپ اوْلمالی
هم‌ده حضوری خدمته، چاتیب، زیارت ائله‌رم
ایندی بو یوْل طلبکارام، چیخان داداش‌دا بوْرجلودور
سلام‌لارین سایین اوْنا، داها زیادت ائیله‌رم
عرض ائده‌رم‌ کی: «سروریم! قُدرته عاشق دگیلم
اجازه وئرسه نیز، فقط خدمته همّت ائیله‌رم!
بئش- آلتی جور مشاورت، اللی رقم معاونت
اوْندان علاوه، اوْن یئره، اؤزوم وزارت ائیله‌رم»!
بوْللوجا وار زیرک‌لیگیم، هم ال- آیاق، هم‌ده اوزوم
بو سرمایایلا، هر یئره گئده‌م، ریاست ائیله‌رم
ائده‌رسه «آرش» انتقاد، ساققالینا گوله- گوله
سؤزلرینی تکذیب ائدیب، اؤزون ملامت ائیله‌رم