به مناسبت۴ دی تولد حمید آرش آزاد «دی» آیی‌نین دؤردو
شاعرین ۶۱- نجی دوْغوم گونو مناسبتی‌ایله
بودا آلتمیش یاشیمیزدان…!
آی- ایل دوْلاندی، آلتمیشی آشدی یاشیم منیم
داش‌دان- داشا دگیب بو جهان‌دا باشیم منیم
ائولندیلر آتام‌لا آنام بیرایل اؤنجه‌سی
آشپز ایکی اوْلوب، بیشیریلدی آشیم منیم
چون ایلک اوشاق منم، نه جمال وار، نه بوْی- بوخون
اوستاد دگیلدی ایش‌ده هله نقّاشیم منیم
آنجاق جوْشاردی چون آنادا شعر؛ هم‌ده طنز
اوْلموش هُنَر اَزل‌دن ایکیز قارداشیم منیم
عشقیم وارایدی شادلیق ائده‌م، چوْخ دئییب- گولم
آنجاق‌کی هر زمان غم اوْلوب سیرداشیم منیم
قونداق- بله‌ک‌ده «اینقه» دئیه‌ن گون‌دن، ایندی‌یه
بوْش ادّعالی باش‌لارا دوشموش داشیم منیم
ناصح دئییب‌کی، تیتره‌‌در افلاکی ریشه‌دن
دیل‌ده- دوْداق‌دا گزسه «نیناش- ناش- ناش»- یم منیم
اصلاح خیالی وار، بیلیرم، آمما قوْرخورام
کوْر ائیله‌یر گؤزو، کی دوزه‌سین قاشیم منیم
آنجاق جواب‌دا، من‌ده اوْنا سؤیله‌رم: «گالا…!»
بیر باش واریم بو دونیادا، مین اوْیناشیم منیم
شادلیق باغیشلا بیر منه، روحیّه‌لر وئریر
یوزلرله دوْست- آشنا، ناباب یوْلداشیم منیم
ائل‌لر سئویرکی طنز قوْشام هرگون- هر زمان
خدمت‌ده خلقه، اوْلماسین هئچ چاش- باشیم منیم
یالتاق مدیحه‌چی قوْی آلا سکّه- جایزه
چوْخ پاک محبّت ائل‌دن اوْلوب پاداشیم منیم
مین بونجا شعرلرده قوْشام، طنزلر یازام
گؤرجک خانیم، دئییرکی: «بودور فرّاشیم منیم»!
«آرش»! چوْخ ایسته‌رم سووارام شعر باغچاسین
افسوس‌کی چوْخ قالیب، چورویوب آبپاشیم منیم
دیدگاهتان را بنویسید