پیس زمان‌دیر، سئوگی اهلین ایندی دلبر قوْرخودور
بس‌کی آرواد حق‌لرین، یار ائتمیش ازبر، قوْرخودور
بیر اله باشماق تایی آلمیش، بیر ال‌ده وردنه
دیل‌ده بئش یوز سؤز – سؤیوش‌له، نازلی دلبرقوْرخودور
بیر طرف‌دن‌ده موقت عقد چون آزاد اوْلوب
تیتره‌ییر هرگون عصب‌لر، آروادی ار قوْرخودور
فوتبالیست ایستیر آبی، یا قیرمیزا بیر قوْل وورا
چون‌کی تهرانلی دگیل اوْ، تئزجه داور قوْرخودور
غم یئمه، چون داورین‌ده یوْخدو چوْخ امنیّتی
هئچ یازیق چای‌دا ایچه‌نمز، چون سمار قوْرخودور
بیر شوْفئر ایستیرکی خلوت یئر تاپیب، پارک ائیله‌سین
تئز اوْنو بیر تابلو، هم اوستونده «پنچر» قوْرخودور
شاعر ایستیر مئی ایچه«خیام»کیمی، «حافظ»کیمی
چون بیلیر «تعزیر»له «حد» وار، ال‌ده ساغر قوْرخودور
اهل- عیال‌لی بیر یازیق مستأجری، ائو صاحبی
گون‌ده قیسقانجا قوْیوب- بیر ایل سراسر قوْرخودور
پول وئریب هندوستانا، پاکستانا، آلدیق دویو
هئی وئریر «بهداشت» اخطار، هئی مکرّر قوْرخودور
انگلیس «تحریم» ائدیرکی، ساتماسین هئچ زاد بیزه
نانجیب آمریکادا اوْنلا برابر قوْرخودور
چین‌ده هر بیرزاد ساتیر، آنجاق نه زادلار؟ زیر- زیبیل
اوْن نفر دوشمن‌دن آرتیق، بیر برادر قوْرخودور
بیرده‌کی، روسیّه وئرمیش چوْخ گؤزه‌ل طیّاره‌لر!
عزراییل‌دیر سان‌کی، آچمیش اوچماغا پَر، قوْرخودور

آلچی دورموش بختین، «آرش»! چال، اوْخو، اوْینا، سئوین
هم سنی دوشمنازیر، هم یار- یاور قوْرخودور