الا، یا، ایُّهاالمخبر! بوگون‌لر اوْلما غافل، ها…!‏
شیرین بیر اتّفاق‌لار ایسته‌ییر دوشسون، بونو بیل، ها…!‏
دوْلاندی هفته‌لر- آی‌لار، گئنه «مُرداد» گلیب- چاتدی
بؤیوک باش‌لار ائدیر سن‌دن بوگون بیر بوْللو تجلیل، ها…!‏
قاریشقا تک، سنی بیر ایل سالیب- ازمیش آیاق آلتدا
یئکه‌لدیر، هم شیشیردیر بیر بوگون، ایستیر ائده فیل، ها…!‏
‏«نمونه» چیخسان البتّه، دئمه‌ک آلچی دوروب بختین
اوْلار بیر لحظه‌ده، مین جایزه بیر یئرده تحویل، ها…!‏
‏«مدیرِ کل» بولوت تک یاغدیرار سکّه باشین اوسته
دوْلار، جیب‌دن داشار بیردن، گتیر بیر چوْخلو زنبیل، ها…!‏
جوایز لطف ائده‌رلر شهردار، فرماندار، اوستاندار
تاپانمازسان وانت حمل ائتمه‌یه، پس ائیله تعجیل، ها…!‏
نمونه چیخماغا، آنجاق بئش- اوْن مین شرط‌لر واردیر
دئییم من، بیر- به بیر اؤیره‌ن، بولاردان اوْلماغا غافل، ها…!‏
شوْفئرلر تک، بیر آیین‌نامه آل، اوچ گونده ازبرله
اقلاً شکلینی اؤیره‌ن، بو فرمان‌دیر، اوْ هندیل، ها…!‏
بیر آزجا احتیاط ائتسه‌ن، اوْلار «گردش به راست، آزاد»‏
ولی «گردش به چپ» ائتسه‌ن، سجلّین اوْلدو باطل، ها…!‏
‏«روابط» وار، «عمومی» آدلانیبلار سازمان‌لاردا
اوْلار «تکذیب»‌ده اوستاددیر، ائده‌رلر یاخشی تحلیل، ها…!‏
خصوصی بیر روابط سال اوْلارلا، قوْی ایشین آشسین
یئری دوشسه، خالانی عقد ائدیب، اوْلسونلا فامیل، ها…!‏
خبر تاپماقدا چوْخ اوْلما فضول، قوْی اؤزلری وئرسین
اؤزون آیدین یازارسان، تئز دوشر ایش‌لرده ایشکیل، ها…!‏
قلم‌ده عقل یوْخ‌دور، نوْختا وور، ایپ باغلا، زنجیرله
آمان‌دیر، اوْلما غافل، آلدادار بیردن عزازیل، ها…!‏
بیرین ووردون نالا، تئزجه بیرین‌ده وور میخا، دورما
مقام‌لاردان اگر بیر انتقاد یازدین، تئز اؤل، سیل، ها…!‏
گئدنده ارشادا، تعظیم ائله هر کیمسه راست گلدی
بوْیون توتسان، یاغار اخطارلا توبیخ، سان‌کی سجّیل، ها…!‏
خوْش‌اخلاق اوْلسان اوْردا، آگهی دایم اوْلار تأمین
گؤرورسن «میم- الف» لی یاغدیریر گؤی‌دن ابابیل، ها…!‏
بیرآز لطفی آزالسا ارشادین، قارداش! ایشین یاش‌دیر
کاغیذ سهمیّه‌سین، فوراً ائده‌رلر اوْردا تعطیل، ها…!‏
گئنه چیخدین جیزیق‌دان، آغزین آچدین، گؤزلرین یومدون
سنه- «آرش»! – بؤیوک بیر خصم‌دیر آغزینداکی دیل، ها…!‏