آجی دونیاده ، شیرین _ دویغولو رویا ، منه سنسن

هر نه اولموشسا آدین ، سئومه‌لی «لیلا» ، منه  سنسن 

بوتون عؤمروم بویو ، بیر یاسلی ائوین،  پاسلی سازییدیم

ساز – سؤز اوستادی ، «علسگر» کیمی اوستا ، منه سنسن

بوغولوردوم ، بالا گؤل‌لرده قالان ، ناققا بالیق تک 

«صمدین» یازدیغی آزاد یئکه دریا،  منه  سنسن

«شهریاردان» ، نه سؤال اولدو ، جوابین دئدی آمما

آغلادیب ساکت ائدن ، نازلی « ثریا »، منه سنسن

ساری کؤینک  کیمی بیر خیردا قوشویدوم ، تیکان اوسته

بؤیوک افسانه یارالدان قوجا «شیدا »، منه  سنسن

قاتدی « آرش» ، آجی درمانلارا، شیرین قارا خرما

آجی‌لیقلاری آزالدان ،  قارا خرما ، منه    سنسن

او کؤچن کروانیمیزدان ، بیزه بیر « نظمی » قالیب دی 

« دآش آ کل» دن ، یئتیشن طوطی گویا ، منه سنسن

دونن آخشام چاغی باخدیم اؤزومه آینادا (#رامین)

بیر غریب قاف داغی‌یام ، کی قریب عنقا ، منه سنسن

 رامین بخشی