سنسیز بولاغه دوندو گوزوم غصه دن، تویوق
یاندیردی آیریلیق منی، یانسین ددن، تویوق
اغیار سوفراسین بزدین هر ناهار- شام
هئچ توتمادین سوراق بیزیم سوفرادان، تویوق
مجنون اونوتسا لیلی نی، فرهاد دا شیرینی
هئچ واقت اونوتمارام سنی بیر لحظه من، تویوق
ناز ائیلمزدی خسرووا شیرین گولبدن
اولسایدی بوشقابیندا بودون یا سینه ن، تویوق
مجنونا یالواراردی او لیلای سنگدل
گر سوفراسینداسن ائله یه یدین وطن، تویوق
یاد اولسون اوزامان کی، گلردین بیزیم ائوه
خوشحال ائدردین عاشقی گه- گاه سن، تویوق
افسوس …! اوندا کی، کوپن ایله وئریردیلر
بیز قدرینی بیلنمه دیک، ای گولبدن تویوق
واردیر یادیمدا بیر دونه سوبسید ده وئردیلر
اولدون نهان اوگون داها هر دیده دن، تویوق
آخیر سوزوم بودور سنه، ای یار بی وفا:
گل وورما جانه آتش درد و محن، تویوق
گر گلمه سن بیزیم ائوه، من قارقارام سنی
تعدیل بلاسینا گلر آخیرده دن، تویوق