حمید آرش عالم ایدیر ائلینه
قمه خنجر باغلامازدیر بئلینه
ساخلایاردیر قلمینین حورمتین
یالان یاوان گتیرمزدیر دیلینه
ائلیمیزین اوجا باشی ساغ اوْلسون
قالانلارین گول اوْزلری آغ اولسون
بئلنجی دیر طبیعتین نیظامی
قارتال لارین مقام لاری داغ اوْلسون
گرک دؤزمه‌ک روزگارین ایشینه
دؤزمک گرک ده‌ییرمانین دیشینه
هرکیمین کیم اتی شیرین دوزلودور
فرصت تاپار چکر قارغا دیشینه
ساوالان تک اوجاباشلی کیشی نی
رحم ائتمه‌دن قار توْرپاق قوجادیر
بیلر کیمی چکه جکدیر کامینا
قارا توْپراق خودبیلیجی قوجادیر
آرشی بوْز توْرپاق چکدی کامینا
ماتمه چولقالادیر اوجابیر ائلی
یْوخ کی اؤلمه یبدیر آرش آزاد
وار ایدیر بیر اوجا قوْجا بیر دیلی
لعنت سنه لعنت آی قاراتورپاق
آغ اوْزلو کس لری چکیرسن کاما
بؤیله دیر طبیعت یامان روزگار
کیمینی دان یئییر کیمینی شاما
آمما یوخ ائل اوْغلو اؤلمه ئییب اؤلمز
دالیندا ائل کیمی آرخاسی واردیر
اوْ بیردم دؤنمه دی دوز ایلقاریندان
ده ده‌سی قوقورد تک یاخاسی واردیر
اوْچیبین اوْلمادی شکر یئمه یه
اوْنو اوْؤلامادی پر شیرین پسر
اوْ دویدو ائل کمدیر اوْباهارا دیر
اوْنو آلداتمادی ساده مختصر
آرش خود تک جانا ائلیدیر ائلده
امک ده کیشی ایدیر نه تکجه دیلده
داغ کیمی دوش وئریب دایانمیشدیر
هر نئجه فیرتانا کوْلکده سئلده
تاریخده آلینی آچیق یاشادی اوزو آغ
ائلیندن آیریلیب اوْلمادی اوزاق
روحو شاد مرامی اوْلسون دواملی
اوْییدیر هر زمان ائلینه دایاق
اوْنون چون اللرده یوخوایدیر الی
فیلان یئرده تیکمه دیر هیکلین
اوْ علم الیقیندن چاتمیشدر حقّه
گؤرور دور هرزادی تام عین الیقین
دوزگون بیر کیشی ایدیر حمید آرش
یْوخودور آرشده ذره غل غش
یاشادی آلینی آچیق اوزو آغ آیدین
مقاما شهرته اولمادیر عطش
خالق ایله آغلاردی خالق ایله گولدو
گول دیلین آتمادی باغیرینا باسدی
ائلینین خالقینین ده‌یرین بولدو
یابانجی بؤر کونو داراخدان اسدی
باشینا قوْیمادی یابانجی بؤرکون
اینینه گئیمه دی یابانجی کوْروکون
ده‌ده‌سی قورقوردون دیلین گؤزلدی
حورمتین ساخلادی هر زمان تورکون
ده ده سی قورقوردو دانمادی بیرآن
یاشادی بیر عؤمور گؤزل بیر اینسان
آناسی تومروسون سودون اَمَر کن
حقیقت یولوندا گؤزله دی ایمان
آوْتور دو مهربان دوردو مهربان
قالارجی ساخلادی آدین هر زمان
هر زمان اینصافی گؤزلدی آرش
آرشه شرط اوّلدو عدالت میزان
آرشین سوگوندا بو نئجه بیتی
قلمیم داملادی گؤزلریم یاشلی
نه دئسین بیر بئله ماتمده «شاهین»
قلمیم گؤزلریم سؤزلریم یاشلی
روحو شاد هر زمان حمید آرشین
یاشامیش محتشم تام اوجا باشلی
عباس سهرابی بناب (شاهین)
۷/۴/۱۳۹۵