آجی چاغلاردا ، شیرین دویغولو رویا ، منه سنسن

خیردا دونیاده ، گئنیش -گزمه لی دونیا ، منه سنسن

او کؤچن کروانیمزدان منه «مجنون» آدی قالمیش

هر نه اولموشسا آدین ، سئومه لی «لیلا» ، منه سنسن

بوتون عؤمروم بویی ، بیر یاسلی ائوین، توزلی سازییدیم

ساز – سؤز اوستادی ، «علسگر» کیمی اوستا ، منه سنسن

بؤغو لاردیم ، بالا گؤل لرده قالان ، ناققا بالیق تک

«صمدین» یازدیغی آزاد یئکه دریا، منه سنسن

«شهریاردان» ، نه سوروشمودولا سون گونده ، دئمیشدی

آغلادیب ساکت ائده ن ، سؤزلو« ثریا »، منه سنسن

ساری کؤینک کیمی بیر خیردا قوشویدوم ، تیکان اوسته

بؤیوک افسانه یارالدان قوجا «شیدا »، منه سنسن

قاتدی « آرش» ، آجی درمانلارا، شیرین قارا خرما

آجی لیقلاری آزالدان ، قارا خرما ، منه سنسن

سنه «رامین» بو غزل چانتاسی کیمدن یئتیشیبدی ؟

«داش آکل دن » یئتیشن طوطی گویا ، منه سنسن

حاج رامین ، بخشی