گؤزللر کؤنلونه قورشاق ساللادیق
وفالی جیرانا چاتا بیلمه دیک
محبت سؤزونو یارا هایلادیق
هیجرانی ویصالا قاتا بیلمه دیک
دوستلارا سؤیله دیک سئوگی سؤزونو
ساتمادیق یالانی دئدیک دوزونو
سالدیق کؤنلوموزه عشقین کؤزونو
گئجه لر حسرتدن یانا بیلمه دیک
یئنیدن سوکولدو دان سحر اولدو
آلیشدی کؤنلوموز گؤزوموز دولدو
یاشاییش باغیندا گولوموز سولدو
سئوگینی اورهکدن آتا بیلمه دیک
درمه دیک بو باغدان نار الدن گئتدی
داغیلدی دودمان وار الدن گئتدی
(آذر) چال باشینا یار الدن گئتدی
الیمیزدن اوچدو توتا بیلمه دیک
برجسب : | ايميل: news@.ir | شماره پيامک:000 |
|
نظرات کاربران در "سن دئدین بیز بیلمه دیک: (جولو جولیه قالمادی) (بیلمه دیک)"