دونیادا هرکیمی‌کی سالمیش سن‌له اُلفت، دستمال
اوز قوْیور دایم اوْنا بوْللو سعادت، دستمال
«توکیو»، «لندن»، «مانهاتان»، «پاریس»‌ده‌مین‌لر«بورس»اولا
هئچ باجارمازلار سنه قوْیسونلا قیمت، دستمال
«قیصریه» یا «امیر» اوْلسون، یا اصلاً هر بازار
سن‌دن اؤترو، وار یئری اوْدلانسا راحت، دستمال
«دئزدئموونا» آدلی، شوخ یارین بوْغوب، اؤلدورسه‌ده
ائتمه‌ییب هئچ وقت «اوْتئللو» بیر جنایت، دستمال
عقلی ناقص آرواد ایدی، بیلمه‌دی قدرین سنین
چون‌کی بیلسه‌یدی، بیرآن ائتمه‌زدی غفلت، دستمال
کیم‌کی غافل اوْلدو سن‌دن، هیچ ترقی ائیله‌مز
حتی یوز ایل ائتسه دوزگون‌لوک‌له خدمت، دستمال
تک زیرک‌لردیر بیلر عالم‌ده قدرین ـ قیمتین
وار وجودوندا سنین مین‌لرله حکمت، دستمال
هر «رئیس»، یاکی «مدیر» گلدی، منه هئچ فرقی یوخ
سن‌له اثبات ائیله‌رم تئزجه ارادت، دستمال
دوزدو من‌ده یوخ سواد، اصلاً هئچ ایش‌ده بیلمه‌رم
سن‌کی وارسان‌ ال‌ده، گؤستررم لیاقت، دستمال
بیر «قشوْو» چکسن، نئجه «اوزدن ایراق» لار خوْش‌لانار
اوز وئریر چوْخ باشچی‌یا، سن‌له اوْ حالت، دستمال
فرقی یوْخ، اوْلسون «فرانسه» یاکی «کرمانشاه» یاغی
سن‌له سورتولسه، ائده‌ر ایش‌ده قیامت، دستمال
بیرده گؤردون رتبه‌م آرتیبدیر، معاون اوْلموشام
بلکه‌ده قسمت اوْلا بیرگون ریاست، دستمال
ایل‌ده اوچ- دؤرد یوْل یازیلدی خارجی مأموریت
ائیله‌دیم هر اؤلکه‌ده دوْرد آی اقامت، دستمال
اهل- عیال، شخصیتیم، روحوم سنه قوربان اوْلا
ائیله‌رم من پول- مقام اوْلسا، قناعت دستمال
چون‌کی «آرش» غفلت ائتمیش سن‌دن هر گون- هر زمان
حشر اوْلونجا وار یئری چکسه فلاکت، دستمال