تئز گؤتور آینا- داراق، گؤستر هُنَر، بایرامدایی
گیزلیجه ائوده بزهن بیر مختصر، بایرامدایی
ارکک اوْلساندا، قاشین آلتین گؤتور، ساپ سال اوزه
آزجا روْژ، بیرده ریمئل چکسهن، یئتهر، بایرامدایی
ایندی موْددور، دیرناغا لاکدا یاخیر اوْغلان- کیشی
«اس.ام.اس»له وئرمهییب کیمسه خبر، بایرامدایی؟!
وئردیلر بیر یئرده آیلیق، همده بایراملیق بیزه
گؤستهریب دؤولت بو ایل بوْللو هُنَر، بایرامدایی!
چوْخ کلان پولدور، اینان، بیر یئرده بئشیوزمین تومن
مین بئله بایرام گله، خرجین گؤرهر، بایرامدایی!
وقتیدیر آرواد- اوشاق پالتار آلا اوْن یئددی دست
هم ائده آوروپایا قیرخ گون سفر، بایرامدایی!
قوْی تورّم عرشه قالخیب، لاپ اوْلا دوْخسان فاییز
کارمنده ایگنهجه وورماز ضرر، بایرامدایی!
مئیوه- آجیل قیمتی لاپ کهکشاندان آشسادا
اینجیدهنمز بیزلری بیر توک قدهر، بایرامدایی!
پوسته اوْلمازسا، قوْناق ایگده یئیهر اوچ- دؤرد دنه
موْزدا یوْخ؟ وئرریک بادمجان- گولبهسر، بایرامدایی
قوْی «فاطی» بایرامدا دا قالسین تومانسیز، عیبی یوْخ
اصل اوْدورکی، اوْلموشوق چوْخ بختهور، بایرامدایی
وورسا مُحکم یومروغون هر لحظه دوشمن آغزینا
دونیاجا خوشبختلیک احساس ائدهر، بایرامدایی
سنده پولسوزسان بیزیمتک؟ یوْخ جیبینده بیر قیران؟
هئچ اوتانما، سوْوقاتین یوْخدور اگر، بایرامدایی
بیر قاییش بایراملیق آلسان بیزلره، بسدیر، داداش
چونکی لازمدیر داها محکم کمر، بایرامدایی
امر ائدیبلرکی، کمر بونداندا چوْخ برک باغلانا
چون گرهک ائتسین قناعتلر بشر، بایرامدایی
بیزلرین قارنی، قاریشقا تک گرهک اوْلسون آریق
وار یئمهک- ایچمهک ده میلیونلار خطر، بایرامدایی!
نؤوروزو تبریک ائدیر «آرش» بوتون انسانلارا
سنده چال- اوْینا بوگون، اوْل عشوهگر، بایرامدایی
برجسب : | ايميل: news@.ir | شماره پيامک:000 |
|